កន្លែងផលិតកាហ្វេនោះជាកម្មសិទ្ធិរបស់ឈ្មោះ Nguyen Thi Loan ដែលត្រូវក្រុមប៉ូលិស និង អ្នកត្រួតពិនិត្យអាហារឆ្មក់ចូលចាប់ កាលពីរសៀលថ្ងៃច័ន្ទកន្លងទៅនេះ បន្ទាប់ពីមានសេចក្ដីរាយការណ៍ពីអ្នកស្រុក អំពីសកម្មភាពគួរឲ្យសង្ស័យរបស់ពួកគេ។
នៅក្នុងអំឡុងពេលនៃការឆ្មក់ចូលចាប់នោះ អាជ្ញាធរបានរកឃើញ កាហ្វេផលិតរួចរាប់តោន ក៏ដូចជា វត្ថុធាតុដើមដែលបានប្រើនៅក្នុងការផលិត រួមមាន ម្សៅខ្មៅ ៣៥ គីឡូក្រាម ដែលយកពីថ្មពិល (ប្រភេទ D Battery) និង ធុងទឹកខ្មៅទម្ងន់ប្រហែល ១០ គីឡូក្រាម ផងដែរ។
យោងតាមអ្នកស្រី Loan បានប្រាប់ថា ខ្លួនបានទិញគ្រាប់កាហ្វេ ដែលគេមិនទទួលទិញ ពីកន្លែងផលិតកាហ្វេធំៗ ក្នុងតម្លៃថោក រួចលាយជាមួយវត្ថុធាតុដើមផ្សេងទៀត ដូចជា ធូលីដី និង ម្សៅថ្ម។ បន្ទាប់មក ប្រើប្រាស់ម្សៅខ្មៅដែលយកចេញពីថ្មពិល ដើម្បីចម្រាញ់ផលិតផលសម្រេច។
អ្នកស្រី Loan បានឆ្លើយសារភាពថា ខ្លួនបានដំណើរការកន្លែងផលិតកាហ្វេខាងលើ អស់រយៈពេលជាច្រើនឆ្នាំមកហើយ និងបានលក់កាហ្វេនោះ ជាង ៣ តោន បើគិតចាប់តាំងពីដើមឆ្នាំ ២០១៨ មក៕
