ភ្ញៀវទេសចរទាំងឡាយ បើចង់ធ្វើដំណើរទៅសហគមន៍ត្រពាំងសង្កែ ត្រូវធ្វើដំណើរចេញពីទីរួមខេត្តកំពត ទៅ ខេត្តកែប តាមផ្លូវលេខ ៣៣ ដែលមានចម្ងាយ ប្រមាណជា ៨ គីឡូម៉ែត្រ នៅខាងស្ដាំដៃ លោកអ្នកនឹងបានឃើញសហគមន៍ត្រពាំងសង្កែនេះ ។
រមណីយដ្ឋានសហគមន៍ទេសចរណ៍ត្រពាំងសង្កែរលំអទៅដោយព្រៃកោងកាងយ៉ាង ស្រស់ត្រកាល មានស្ពានឈើថ្មី ដែលទើបសាងសង់កាត់ព្រៃកោងកាង និង មានទូកជិះលេង លម្ហែកាយមើលអំពិលអំពែកពេលរាត្រី ព្រមទាំងមាន ផ្ទះសំណាក់លម្ហែកាយយ៉ាងស្រស់ស្អាត រងចាំស្វាគមន៍ភ្ញៀវទេសចរ ដែលទៅសម្រាកលម្ហែកាយនៅទីនោះ ។
លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឱ្យដឹងថា សហគមន៍ ទេសចរណ៍ ត្រពាំងសង្កែរ នាពេលនេះកំពង់តែមានភាពទាញភ្ញៀវទេសចរជាតិ និង អន្តរជាតិ យ៉ាងច្រើនឱ្យចូលទៅសម្រាកលម្ហែកាយនៅទីនោះ ។
សហគមន៍ទេសចរណ៍ត្រពាំងសង្កែរមានទេសភាពយ៉ាងស្រស់ត្រកាលលំអទៅដោយព្រៃកោងកាង លាតសន្ធឹងជាប់ទៅនឹងជើងភ្នំ ដែលបានអង្រន់បេះដូង ភ្ញៀវទេសចរទាំងឡាយ ដែលបានទៅកម្សាន្តម្តងហើយ ចង់ទៅកម្សាន្តម្តងទៀត ៕
