ខេត្តសៀមរាប៖ ទារិកាចម្លែកកើតមកមានខ្លួនមួយក្បាល២ និងម្តាយត្រូវបានក្រុមគ្រូពេទ្យយកចិត្តទុកដាក់ជួយសង្គ្រោះឱ្យរស់រានមានជីវិត ផុតពីសេចក្តីស្លាប់ហើយ បន្ទាប់ពីវះកាត់រួចរាល់ កាលពីយប់ថ្ងៃទី០៣ ខែមីនា ឆ្នាំ២០១៨ ស្ថិតនៅក្នុងមន្ទីរពេទ្យគន្ធបុប្ផាសៀមរាប ដែលទារិកាចម្លែកមួយនេះកើតមកមានខ្លួនមួយក្បាលពីរ ហើយបេះដូងមាន៦ថត ប៉ុន្តែម្តាយនៅមានសភាពទន់ខ្សោយនៅឡើយ ក្នុងភូមិត្រពាំងសេះ សង្កាត់គោកចក ក្រុងសៀមរាប ខេត្តសៀមរាប ។ បើតាមសម្តីរបស់ប្អូនស្រីបង្កើតរបស់ម្តាយទារិកា បានរៀបរាប់ប្រាប់នៅថ្ងៃទី០៦ ខែមីនា ឆ្នាំ២០១៨ នេះថា បងស្រីបង្កើតដែលជាម្តាយទារិកាមានឈ្មោះ កេត ម៉ាលី អាយុ៣១ឆ្នាំ មុខរបរមេផ្ទះ និងបងថ្លៃត្រូវជាឪពុកទារិកា ឈ្មោះ តាំង សារី អាយុ៣៨ឆ្នាំ អតីតជាអ្នកបកប្រែភាសាចិន មានស្រុកកំណើតនៅភូមិ ដំណាក់លួង ឃុំវត្តគរ ស្រុកបាត់ដំបង ខេត្តបាត់ដំបង បច្ចុប្បន្នពួកគាត់មកជួលផ្ទះគេនៅម្តុំបាក់ខែង ក្នុងសង្កាត់ស្វាយដង្គំ ក្រុងសៀមរាប ។ ចំណែកទារិកាដែលកើតមកមានទម្ងន់ជិត៤គីឡូក្រាម បច្ចុប្បន្នប្តីរបស់គាត់ទៅជាសរសៃប្រាសាទហើយ គេឈប់ហៅគាត់ទៅធ្វើការងារទៀត ព្រោះគាត់ដើរនិយាយតែម្នាក់ ។ គាត់មានកូន៤នាក់ ប្រុស១នាក់ ស្រី៣នាក់ ទាំងទារិកា នៅក្នុងបន្ទុកកូនស្រីទី១ អាយុ១៣ឆ្នាំ កូនស្រីទី២អាយុ៦ឆ្នាំ កូនប្រុសទី៣អាយុ៤ឆ្នាំ និងកូនស្រីទី៤ ដែលកើតមកមានខ្លួន១ក្បាល២នេះ ។ ហើយកូនស្រីច្បង និងកូនប្រុសទី៣ ត្រូវបានម្តាយក្មេងយកទៅចិញ្ចឹមបីបាច់ ដើម្បីឱ្យរៀនសូត្រ ចំណែកកូនស្រីទី២ ខ្ញុំនិងជួយយកទៅនៅជាមួយខ្ញុំ ឱ្យវាបានរៀនសូត្រនឹងគេឯង ។ ឬឯ កូនស្រីពៅរបស់គាត់កំពុងនៅជាមួយគាត់ ក្នុងមន្ទីរពេទ្យនៅឡើយ បើនៅរស់គឺនាងខ្ញុំជាអ្នកដាក់ឈ្មោះ (សំណាង) ។ ប្អូនស្រីបានរៀបរាប់បន្តថា បច្ចុប្បន្ន ម្តាយ និងកូន ត្រូវបានក្រុមគ្រូពេទ្យឱ្យគេងនៅ គ្រែផ្សេងគ្នា ព្រោះដោយសារស្ថានភាពម្តាយ មិនសូវមានកម្លាំងកំហែងទេ ដូច្នេះបានជាក្រុមគ្រូពេទ្យឱ្យបំបៅដោយទឹកដោះគោ ។ តាមប្រភពពីក្រុមគ្រូពេទ្យម្នាក់សូមមិនបញ្ចេញឈ្មោះបានប្រាប់ថា ក្រោយពីបានធ្វើការវះកាត់ពីស្ត្រីដែលយកទារិកាចេញមកនោះ ឃើញថាទារិកានេះមានភាពចម្លែក ខ្លួន១ក្បាល២ ព្រោះនៅក្នុងមន្ទីរពេទ្យគន្ធបុប្ផាសៀមរាប មិនដែលធ្លាប់មានទាល់តែសោះ ។ ប្រភពបានបន្តថា បច្ចុប្បន្ន ម្តាយ និងកូន ត្រូវបានក្រុមគ្រូពេទ្យជួយសង្គ្រោះរួចផុតឱ្យមានសេរីភាពទាំងពីរនាក់ម្តាយ និងកូន ហើយគ្រាន់តែស្ថានភាពសុខភាព ម្តាយមានសភាពខ្សោយនៅឡើយ ដូច្នេះក្រុមគ្រូពេទ្យមិនទាន់អនុញ្ញាតឱ្យពួកគាត់ត្រលប់ទៅផ្ទះវិញទេ ដោយសារទុកនៅតាមដានបន្ត ។ បច្ចុប្បន្ន ម្តាយ និងកូនក្បាល២នោះ ត្រូវបានក្រុមគ្រូពេទ្យ និងលោកប្រធានមន្ទីរពេទ្យ ជនជាតិបារាំង កំពុងឱ្យក្រុមសន្តិសុខយាមកាមយ៉ាងតឹងរឹង ខ្លាចមានអ្នកយកព័ត៌មាន ឬក្រុមគ្រួសារលួចបញ្ចេញរូបថតទៅខាងក្រៅ ។ សូមបញ្ជាក់ផងដែរថា នេះគឺជារឿងដ៏ចម្លែកមួយ ដែលបានកើតឡើងនៅក្នុងខេត្តសៀមរាប ជាលើកទី១ ហើយក៏ជារឿងដ៏រន្ធត់ដែលម្តាយគ្រប់រូបមិនធ្លាប់នឹកស្មានដល់ផងដែរ ៕
ប្រភពៈ កោះសន្តិភាព
